(1)
زوجين متدينين
الزوج : إني أحبك في الله
الزوجة : وانا بعد أحبك في الله استغفرالله من كل ذنب عظيم
الزوج : بكل صلاة ما أنساك من دعائي
الزوجة : بارك الله فيك وجزاك الله خير
الزوج : شكثر تحبيني ؟
الزوجة : عدد ما غرد طير وطار وتعاقب الليل والنهار ودعا داع في الأسحار
الزوج : الله يا سلام على هالكلام ذكرتيني بليالي رمضان
الزوجة : متى نروح العمرة ؟
الزوج : قبل أسبوع كنّا في العمرة !!
الزوجة : اجل نغير نروح المدينة
الزوج : على بركة الله
قبل لا يقومون من القهوة
الزوجة : أبا عبيدة
الزوج : نعم يا أم عبيدة
الزوجة : دعاء كفارة المجلس ( كله حب شكت أم عبيدة )
الزوج : سبحانك الله وبحمدك أشهد أن لا إله إلا أنت استغفرك وأتوب إليك
(2)
زوجين صايعين
الزوج : تصدقين ما حبيت وحده كثرك
الزوجة : وانا بعد حبيت بس مثلك أبد ما حبيت
الزوج : انتي خليتي حياتي كووول
الزوجة : وااي انت ستايل وتهبل تشبه توم كروز
الزوج : تذكرين أول مرة شفتك فيها وين ؟
الزوجة : اي كنت أقز مع حصوه بالمارينا
الزوج : الله كان أسعد يوم بحياتي
الزوجة : شكثر تحبني ؟
الزوج : كثر جمهور نادي النصر
الزوجة : ترى ذبحتني بنادي النصر يلوعون الكبد
الزوج : يا عمري انا أشجع نادي النصر عشان لونهم يذكرني بضروسك
الزوجة : اجل تدري ليش أنا أشجع نادي الاتفاق؟
الزوج : ليش ؟
الزوجة : عشان ريحة البصل تذكرني فيك
الزوج : الله عسل عسل دمك شربات
الزوجة : قوم قوم قبل لا أقط الرقم على اللي كاشخ وراك
(3)
زوجين أغبياء ودمهم ثقيل
الزوج : يا حيالله أبو الوجه الصبوحي .. أبو الوجه الصوبوحيي ييي
يييي
الزوجه : لا تذكرني بلندن بروحي ودي أسافر لها
الزوج : شكو لندن ؟
الزوجة : هذي مو أغنية عبدالكريم اللي صورها بالـ هايد بارك
الزوج : والله ما أدري بس يسويها عبدالكريم عبدالقادر
الزوجة : ودي أروح لندن وأنت معاي
الزوج : لا والله
الزوجة : شفيك علي اليوم
الزوج : يعني مع مين بالله .. العادة تروحين مع السايق مثلا ؟
الزوجة : لا مو قصدي السايق .. بعدين احنا ما عندنا سايق شلون أروح معاه ؟
الزوج : اللهم طولك يا روح
الزوجة : خلاص خلاص غير الموضوع
الزوج : حبي لك ماله حدود
الزوجة : الله وناسه يعني بدون جوازات وكذا
الزوج : اي ذكرتيني .. أمس رحت دوار الجوازات بجدد جوازي ما لقيت أحد
الزوجة : يا حظي مو بدوار الجوازات
الزوج : مو انتي ذيك المرة قلتي سويتوا حادث وودّوكم دوار العظام ؟
الزوجة : بصراحة مو متأكدة
الزوج : تدرين إن لازم يسوون دوار بإسمنا انا وياك
الزوجة : الله دوّار حبنا
(4)
زوجين ضغاط
الزوج : تصدقين بيوم عرسنا كنت خايف حدّي !
الزوجة : انا كنت خايفه عليك بعد
الزوج : كنت خايف أبوك يفشّلنا وينجب من البوفيه حق بيتكم
الزوجة : نعم نعم ؟
الزوج : أتغشمر معاك شفيك!
الزوجة : اجل ما شفت أمك واهيا تتعلك خفت عليها يطيح حنكها
الزوج : عاد ما أرضى على أمي
الزوجة : حتى انا ما أرضى على أبوي
الزوج : أخوك الكبير بأي محل برْدات مفصّل ثوبه ؟
الزوجة : يمكن بنفس المحل اللي فصلت فيه أختك مو متأكده
الزوج : تذكرين خالتك لابسه كعب ثلاث طوابق
الزوجة : اي تذكرت لما كانت واقفة يم خالتك اللي حاطه حمره تقول شاربه شاني
الزوج : تصدقين أحلى ما فيك بالعرس النفره اللي طالعه بجبهتك
الزوجه : وااي انت تهبل بالشعر اللي طالع من أذونك
الزوج : شرايك نمشي ونكمل سوالف بالطريق ؟
الزوجة : على راحتك حبيبي
(5 )
زوجين أغنياء
الزوج : أقول حبيبتي شرايك بغدانا أمس في فينيسيا ؟
الزوجة : بصراحة القعدة حلوة بس أكلهم مو زود
الزوج : انا بصراحة عجبني أحسن من مطعمنا في روما
الزوجة : زين انا رايحة باريس تمورو بتسوّق تبي شي من هناك ؟
الزوج : متى بترجعين ؟
الزوجة : ما أدري على حسب يمكن توو دييز وأرجع
الزوج : خذيتي مليونك من أبوك ؟
الزوجة : وييه الله يعافيك روح أخذه ما يمديني
الزوج : اجل بأي حساب بتتسوقين ؟
الزوجة : ما عليه بصرف من حساب خلودي ولدي فيه 300 ألف
الزوج : عاد رجعيهم له مو تنسين حرام فلوسه يبي يستانس فيهم الولد
الزوجة : انت وين بتروح في هالويكند ماي سويت هارد ؟
الزوج : ودي أروح معاك بس مواعد الوليد بن طلال عازمني على العشا بكرا
الزوجة : اوكي انا بسافر بالطياره الرمادية عبّيتها بانزين ؟
الزوج : اي فيها بانزين أكيد وانا بروح باليخت مالي ودي أحدق بطريق الرده
الزوجة : قود نايت حبيبي وسويت دريمز
الزوج : قود نايت ماي سويت هارد
(6)
زوجين صواريخ
الزوجة : ما قلت لك يوم طاحت فينا الطيارة ذيك السنة ؟
الزوج : مرة ثانية ؟
الزوجة : اييي مرة ثانية يوم أمي تعلقت بجناح الطيارة وطارت عبايتها
الزوج : اوف اوف اوف صدق والله !!
الزوجة : أمي مسكينة ايدها تعبت وهدت جناح الطيارة
الزوج : وبعديييين ؟
الزوجة : الحمدلله ما صار فيها شي أبوي لحق عليها بالبرشوت
الزوج : الحمدلله والا بغت تروح فيها مسكينة
الزوجة : انا من الخرعة طبيت بدون برشوت وبدون ولا شي
الزوج : وبعدييييييين ؟
الزوجة : لقيت أبوي بالسما مع أمي قلت لهم لحقوني
الزوج : سبحان الله شوف الصدفة
الزوجة : اي انا عقبها حرمت اركب طيارات
الزوج : انا مرة بغيت أموت يوم كنت أسوق سيكل وطحت فيه من الجسر
الزوجة : اسم الله عليك وبعديييين ؟
الزوج : الحمدلله اني طحت على ساعتي ما تعورت
الزوجة : وليش طحت من السيكل ؟
الزوج : انا كنت دايس تقريبا 200 فيوم صعدت الجسر لف السيكل فيني
الزوجة : وبعديييييييين ؟
الزوج : كان أتصل على الاسعاف يمكن بالطيحة أتعور لا سمح الله
الزوجة : هذا وانت طايح من السيكل وتتصل ؟
الزوج : اي وما حسيت والا أدعم الصخره حقت الجسر وأطيح من فوق
الزوجة : وبعدييييين ؟
الزوج : كان أحط التلفون بجيبي ولبست ساعتي
الزوجة : كانّه صك علي .. اي كمّل
الزوج : كان طربااااخ وإلا أطيح على ساعتي وتكسرت والا الاسعاف وصلوا
الزوجة : الحمدلله على السلامه
(7)
زوجين صغار
الزوج : تصدقين خلصت المرحلة الأخيرة بهاللعبة ؟
الزوجة : بيييه انا من زمان خلصتها .. ألحين عندي لعبة جديدة
الزوج : أقول دقي على هارديز اطلبي لي هابي ميل
الزوجة : اي حتى انا مشتهية هابي ميل يوزعون معاها لعبة شريك
الزوج : وإذا دق علي حمني البطّه قولي له مو موجود
الزوجة : زين قوم خل نكمل بلاي ستيشن
الزوج : لحظة متابع حلقة سلاحف النينجا ألحين بتطلع على سبيس تون
الزوجة : شايفتها هالحلقة مو حلوة
الزوج : عاد لاتخربين علي يوم طلع باباي البوكيمون ما خربت عليك
الزوجة : خلاص خلاص لا تزعل بعدين تروح تنادي أمك
الزوج : ترى والله أزاعلك من صدقي
الزوجة : عطني كبوسي حقي انا شريته
الزوج : يعني نحاسه .. انا أوريك بس يخلص الباباي
(
زوجين شيّاب
الزوج : انا بعرف الدكتور مالي ما يفهم غبي ؟
الزوجة : هوْهوْهوْ شفيك يا بوصالح أمس تمدحه واليوم تذمّه ؟
الزوج : يا ام صالح الدختر أثولْ ما يفتهم شعرّفه ؟
الزوجة : ألحين صار غبي ما يفتهم ؟ صدق منكر حسنه !!
الزوج : ما يدري إن هاللي قاعدة قدامي اهيا علاج السكري والضغط وأمراض الدنيا
الزوجة : يمّه منك عيّار ما تجوز عن سوالفك يا بوصالح
الزوج : انتي لو في منّك واجد كان سوّوهم ابرّ حق المراضى
الزوجة : ذكرتني بأيام أوّل يوم تقص علي في بيت أبوي العود وتغازلني
الزوج : آآآآه يا زينها من أيام
الزوجة : انا كنت أطلطل من الدريشه وإلا أشوف هالحافي العصل المهتمل اللي دخل قلبي من أوّل نظررره
الزوج : ايييي هذا انا عدل عدل .. في السكه مع عيال بن نعلب تيلب
الزوجة : شكنت تسوي ما عاد أذكر شي !
الزوج : يوم أدز اختي الصغيرة تقولك غطاوي وانتي طاقتك البوهه
الزوجة : يا علّك شقوووول ذكرتني " إذا تلّيت حزامه تهلهلت عظامه " !!
الزوج : وانتي تقولين الجندل شكووووووووو
الزوجة : شعرفني بالغطاوي هوْ غصب ما عرف ما افهم
الزوج : هذا اللي علقني فيك أكثر
الزوجة : قوم قوم روح يعطونك ابرة السكر الظاهر ارتفع
الزوج : هذا جزاي أتغشمر معاك
الزوجة : يمه منك كذاب
(9)
زوجين نكته
الزوج : يقولك في مدرس سأل الطلبة اللي غبي يوقف .. كان يوقف واحد سأله المدرس ليش وقفت ؟ قال ما حبيت أشوفك واقف بروحك يا استاذ :>
الزوجة : يعني دمك خفيف ؟ اسمع : في مرة واحد دخل السلك الدبلوماسي تكهرب هاهاهاها
الزوج : يخرب بيت الملاغه سمعي : كلب شوارع مر على مركز شرطة شاف كلب بوليسي قال : آآخ لو مكمل دراستي هههههه
الزوجة : ترى صدق صدق دمك ثقيل اسمع : في واحد قاعد يطق الدجاجه حقتهم ليش ؟
الزوج : ليش ؟
الزوجة : يقولها كل يوم بيض كل يوم بيض ما في جبن .. هي هي هي
الزوج : ملاقه كذا ما شفت سمعي : في بزر عمره ثلاث سنوات قال حق أمه الحامل شنو في بطنك؟؟ قالت له : هذا أخوك الصغير ...
الزوجة : هاهاهاهاهاها
الزوج : لحظة ما خلصت يا الغبية !!
الزوجة : اوكي
الزوج : قال لها : تحبينه ؟ قالت له : اي أحبه .. قال لها : اجل ليش بلعتيه ؟
الزوجة : خلصت ؟
الزوج : يالله الحين الناس يضحكون :>
ـــــــــــــــــــــــــــــــــــــــــــ
تصدق قسمة ونصيب
موضوع: اضحكو على المتزوجين 
الإثنين مارس 24, 2008 3:50 am
